Stjörnuspáin

Sannleikurinn snýr aftur

Eftir ágætis tímabil fréttastofu Sannleikans á Vísi.is höfum við ákveðið að færa okkur aftur yfir á okkar gamla vefsvæði. Svo virðist sem ritstjórnarstefna Sannleikans samræmist ekki stefnu fréttastofu Vísis. Hægt er að segja að komið hafi upp listrænn ágreiningur.

Við viljum ekki fjötra okkur og heillindi blaðamennsku okkar með svokölluðum staðreyndum,- fyrirbrigði sem ég tel heftandi í blaðamennsku. Við viljum skapa, búa til og hafa frelsi til að flytja þær fréttir sem við viljum sjá gerast. Ekki sóa tíma og fjármunum að elta uppi fólk sem var á staðnum, veit eitthvað um málið eða telst til sérfræðinga um málefnið. Slíkt setur blaðamennskunni ákaflega þröngt form en það er okkar sannfæring að algjört listrænt frelsi til tjáningar eru lykilatriði í hverri frétt.

Aðeins frjáls eins og bleyjulaust ungabarn getur nakinn sannleikurinn mígið yfir þá sem meira mega sín.

Hugsanlega gætuð þið heyrt því fleygt fram að ég hafi verið látinn fara vegna "áfengisvandamála". Það er gamalt og lúalegt bragð, ofnotað til að losa sig auðveldlega við þá sem ekki passa inn en ég fullvissa ykkur, ég lít ekki á áfengisneyslu mína sem vandamál.